Cerberus

Caecilius est in hortō. Caecilius in hortō sedet. servus est in ātriō. servus in ātriō labōrat. Metella est in ātriō. Metella in ātriō sedet. Quīntus est in tablīnō. Quīntus in tablīnō scrībit. Cerberus est in viā.
coquus est in culīnā. coquus in culīnā dormit. Cerberus intrat. Cerberus circumspectat. cibus est in mēnsā. canis salit. canis in mēnsā stat. Grumiō stertit. canis lātrat. Grumiō surgit. coquus est īrātus. "pestis! furcifer!" coquus clāmat. Cerberus exit.

Mercātor

amīcus Caecilium vīsitat. amīcus est mercātor. mercātor vīllam intrat. Clēmēns est in ātriō. Clēmēns mercātōrem salūtat. Caecilius est in tablīnō. Caecilius pecūniam numerat. Caecilius est argentārius. amīcus tablīnum intrat. Caecilius surgit.
"salvē!" Caecilius mercātōrem salūtat.
"salvē!" mercātor respondet.
Caecilius triclīnium intrat. amīcus quoque intrat. amīcus in lectō recumbit. argentārius in lectō recumbit.
Grumiō in culīnā cantat. Grumiō pāvōnem coquit. coquus est laetus. Caecilius coquum audit. Caecilius nōn est laetus. Caecilius cēnam exspectat. amīcus cēnam exspectat. Caecilius Grumiōnem vituperat.

In triclīniō

Grumiō triclīnium intrat. Grumiō pāvōnem portat. Clēmēns triclīnium intrat. Clēmēns vīnum portat. Caecilius pāvōnem gustat.
"pāvō est optimus!" Caecilius clāmat.
mercātor quoque pāvōnem gustat. mercātor cēnam laudat. dominus coquum laudat. Grumiō exit.
ancilla intrat. ancilla suāviter cantat. ancilla dominum dēlectat. ancilla mercātōrem dēlectat. mox dominus dormit. amīcus quoque dormit.
Grumiō triclīnium intrat et circumspectat. coquus cibum in mēnsā videt. Grumiō cibum cōnsūmit et vīnum bibit! Caecilius Grumiōnem nōn videt. coquus in triclīniō magnificē cēnat.
coquus ancillam spectat. ancilla Grumiōnem dēlectat. Grumiō ancillam dēlectat. Grumiō est laetissimus.

In forō

Caecilius nōn est in vīllā. Caecilius in forō labōrat. Caecilius est argentārius. argentārius pecūniam numerat.
Caecilius forum circumspectat. ecce! pictor in forō ambulat. pictor est Celer. Celer Caecilium salūtat.
ecce! tōnsor quoque est in forō. tōnsor est Pantagathus. Caecilius tōnsōrem videt.
"salvē!" Caecilius tōnsōrem salūtat.
"salvē!" Pantagathus respondet.
ecce! vēnālīcius forum intrat. vēnālīcius est Syphāx. vēnālīcius mercātōrem exspectat. mercātor nōn venit. Syphāx est īrātus. Syphāx mercātōrem vituperat.


Pictor

pictor ad vīllam venit. pictor est Celer. Celer iānuam pulsat. Clēmēns pictōrem nōn audit. servus est in hortō. Celer clāmat. canis Celerem audit et lātrat. Quīntus canem audit. Quīntus ad iānuam venit. fīlius iānuam aperit. Celer Quīntum salūtat et vīllam intrat.
Metella est in culīnā. Quīntus mātrem vocat. Metella ātrium intrat. pictor Metellam salūtat. Metella pictōrem ad triclīnium dūcit.
Celer in triclīniō labōrat. Celer pictūram pingit. magnus leō est in pictūrā. Herculēs quoque est in pictūrā. leō Herculem ferōciter petit. Herculēs magnum fūstem tenet et leōnem verberat. Herculēs est fortis.
Caecilius ad vīllam revenit et triclīnium intrat. Caecilius pictūram intentē spectat et pictūram laudat.


Tōnsor

tōnsor in tabernā labōrat. tōnsor est Pantagathus. Caecilius intrat.
"salvē, tōnsor!" inquit Caecilius.
"salvē!" respondet Pantagathus.
tōnsor est occupātus. senex in sellā sedet. Pantagathus novāculam tenet et barbam tondet. senex novāculam intentē spectat.
poēta tabernam intrat. poēta in tabernā stat et versum recitat. Caecilius rīdet, sed tōnsor nōn rīdet. versus est scurrīlis; tōnsor est īrātus. "furcifer! furcifer!" clāmat Pantagathus. senex est perterritus. tōnsor barbam nōn tondet. tōnsor senem secat. multus sanguis fluit.
Caecilius surgit et ē tabernā exit.

Vēnālīcius

Caecilius ad portum ambulat. Caecilius portum circumspectat. argentārius nāvem Syriam videt, et ad nāvem ambulat. Syphāx prope nāvem stat.
"salvē, Syphāx!" clāmat argentārius. Syphāx est vēnālīcius. Syphāx Caecilium salūtat.
Caecilius servum quaerit. Syphāx rīdet. ecce! Syphāx magnum servum habet. Caecilius servum spectat. argentārius nōn est contentus. argentārius servum nōn emit.
"vīnum!" clāmat Syphāx. ancilla vīnum ad Caecilium portat. argentārius vīnum bibit.
Caecilius ancillam spectat. ancilla est pulchra. ancilla rīdet. ancilla Caecilium dēlectat. vēnālīcius quoque rīdet.
"Melissa cēnam optimam coquit," inquit vēnālīcius. "Melissa linguam Latīnam discit. Melissa est docta et pulchra. Melissa..."
"satis! satis!" clāmat Caecilius. Caecilius Melissam emit et ad vīllam revenit. Melissa Grumiōnem dēlectat. Melissa Quīntum dēlectat. ēheu! ancilla Metellam nōn dēlectat.


Hermogenēs

Caecilius est in forō. Caecilius in forō argentāriam habet. Hermogenēs ad forum venit. Hermogenēs est mercātor Graecus. mercātor Caecilium salūtat.
"ego sum mercātor Graecus," inquit Hermogenēs. "ego sum mercātor probus. ego pecūniam quaerō."
"cūr tū pecūniam quaeris?" inquit Caecilius.
"ego nāvem habeō," respondet Hermogenēs. "sed nāvis nōn adest; nāvis est in Graeciā. ego tamen sum probus. ego semper pecūniam reddō."
"ecce!" inquit Caecilius. "ego cēram habeō. tū ānulum habēs?"
"ego ānulum habeō," respondet Hermogenēs. "ānulus signum habet. ecce! ego signum in cērā imprimō."
Caecilius pecūniam trādit. mercātor pecūniam capit et ē forō currit.
ēheu! Hermogenēs nōn revenit. mercātor pecūniam nōn reddit. Caecilius Hermogenem ad basilicam vocat.


In basiclicā - iūdex basilicam intrat.

iūdex: quis es tū?
Caecilius: ego sum Lūcius Caecilius Iūcundus.
iūdex: tū es Pompēiānus?
Caecilius: ego sum Pompēiānus.
iūdex: quid tū in urbe agis?
Caecilius: ego cotīdiē ad forum veniō. ego sum argentārius.
iūdex: cūr tū hodiē ad basilicam venīs?
Caecilius: Hermogenēs multam pecūniam dēbet. Hermogenēs pecūniam nōn reddit.
Hermogenēs: Caecilius est mendāx!
iūdex: quis es tū?
Hermogenēs: ego sum Hermogenēs.
iūdex: Hermogenēs, quid tū in urbe agis?
Hermogenēs: ego in forō negōtium agō. ego sum mercātor.
iūdex: quid tū respondēs? tū pecūniam dēbēs?
Hermogenēs: ego pecūniam nōn dēbeō. amīcus meus est testis.
amīcus: ego sum testis. Hermogenēs pecūniam nōn dēbet. Caecilius est mendāx.
Caecilius: tū, Hermogenēs, es mendāx. amīcus tuus quoque est mendāx. tū pecūniam nōn reddis...
iūdex: satis! tū Hermogenem accūsās, sed tū rem nōn probās.
Caecilius: ego cēram habeō. tū signum in cērā vidēs.
Hermogenēs: ēheu!
iūdex: Hermogenēs, tū ānulum habēs?
Caecilius: ecce! Hermogenēs ānulum cēlat.
iūdex: ubi est ānulus? ecce! ānulus rem probat. ego Hermogenem convincō.

#